Ребека: Ни требаат волонтери кои ќе работат со децата со посебни потреби

Објавено на: Sep 15, 2015 од Мама Силвана

Ребека Јанковска Ристески е мајка на три деца, успешна поп-пејачка и претседател на Здружението на граѓани за лица со дисфункции, хендикеп, ретки болести и посебни потреби „Дајте ни крилја“.

Во рамките на Здружнието кое постои веќе пет години, организирале многу активности, акции со кои им помогнале на деца и возрасни со ментална и физичка дисфункција, истуркале проекти во институциите со помош на кои ќе им се олесни секојдневието на овие лица.

Викендов во рамките на одржувањето на Државното коњичко првенство за прескокнување на пречки на Македонија на хиподромот во Радишани беше одржана модна ревија на шапки кои беа продадени во хуманитарни цели.

Собраните средства се наменети за купување на коњ за хипотерапија и обука остручување на хипотерапевти со цел да се помогне во рехабилитација и ревитализација на деца со посебни потреби.

Нејзиниот син Маркијан од 4,5 години ја применува оваа терапија и според Ребека истата има повеќекратно позитивно дејство врз него.

Од кога почна Маркијан да јава на коњ, и како терапијата влијаеше врз него?

Ребека: Маркијан јава од 4,5 години. Имаше проблеми со држење на телото. Но хипотерапијата му помогна да го држи телото исправено, да ја зацврсти кичмата, поубаво да се движи. Но исто така многу му помогна и психички, во зголемување на самодовербата. Тука е и социјалниот аспект. Маркијан за првпат на коњот му даде морков за да јаде.Тој до тогаш, немаше таков однос спрема другите. Овие деца исто така се приморани цело време да бидат во затворени простории и да гледаат луѓе во бели мантили, дружењето со коњот им овозможува поминување на време во природа, што е од големо значење. На тој начин се дружат и се опуштаат.

Колку време во Здружението работите со хипотерапија?

Ребека: Па веќе пет години ја применуваме оваа терапија, но немаме коњ, имавме еден кој за жал ни почина.Ни требаат финансиски средства, но и луѓе кои ќе помагаат.Потребно е да има сенс и од институциите, бидејќи еве конкретно во Србија, Министерството за здравство ја поддржува терапија, одвојува прилично големи средства и им се помага на овие деца. Ни требаат волонтери, бидејќи ова е тимска работа.Ни требаат луѓе кои два до три часа во неделата ќе им помагаат на овие деца при јавањето, бидјеќи треба да се држат од двете страни.

Дали Маркијан оди на училиште и какво е вашето искуство со инклузивноста на овие деца во образовните установи?

Ребека: Да, Маркијан оди на училиште.Најпрво тргна во ОУ „Кочо Рацин“, но не беше прифатен од децата, ниту од кадарот. Не се потрудија да го прифатат, ниту да ја разберат неговата состојба. Децата се однесуваа многу невоспитано, го тепаа, го нарекуваа со најпогрдни зборови. Поминавме многу лошо. Потоа го запишавме во ОУ „Димо Хаџи Димов“, бидејќи за децата со посебни потреби може, но и не мора да важи законот за да се запишат во реонско училиште. Во ова училиште наидовме на одличен прием.Родителите ги подготвиле децата дека ќе се сретнат со дете со нетипичен развој. Кадарот исто така ни излезе во пресрет, така што многу сме задоволни. Таму, го доживеавме и тоа, тие нас да не прашаат дали сме задоволни од нив.Маркијан е придружуван од специјалист едукатор, кој приватно си го плаќаме.

Во Здржението има и други деца со посебни потреби, така што како се снаоѓате за терапија?

Ребека: Повеќе здруженија формиравме Алијанса за ретки болести. И после долги години борба, имавме состанок во Министерство за здравство каде што ги образложивме нашите проблеми. И конечно успеавме лековите за лицата со ретки болести да ги ставиме на позитивна листа. Тоа е големо олеснување за родителите и децата, бидејќи ќе можат да добијат лекот бесплатно.

ПОВЕЌЕ ЗА ХИПОТЕРАПИЈАТА ПРОЧИТАЈТЕ ОВДЕ:

Што е хипотерапија и како таа им помага на децата со посебни потреби?


Мама365.мк ги задржува сите авторски права. Оваа содржина НЕ смее да се копира, размножува или на било кој друг начин да се дистрибуира без писмено одобрение од мама365.мк. Превземањето може да се врши ЕДИНСТВЕНО со наведување на мама365.мк како извор на содржината, со линк до соодветната содржина поставена на изворната страна www.mama365.mk



Коментари

Би можело да ве интересира и…